Əmək və Əhalinin Sosial Müdafiəsi Nazirliyi ölkədə əmək münasibətləri, əməyin mühafizəsi, əmək ehtiyatlarından istifadə, əhalinin sosial müdafiəsi, o cümlədən əmək pensiyaları və sosial sığorta, əhalinin məşğulluğu sahələrində dövlət siyasətini həyata keçirən mərkəzi icra hakimiyyəti orqanıdır. Hazırda nazirliyin tabeliyində 6 dövlət komitəsi fəaliyyət göstərir. Bu komitələrin hər birinin iş fəaliyyəti nazirliyin əsas istiqamətləri üzrə bölünüb.
Dövlət Məşğulluq Agentliyində müəyyən kateqoriyalı işsiz və işaxtaran kimi qeydə alınan şəxslərin birdəfəlik, qısamüddətli, mövsümi işlərə cəlb edilməsinin asanlaşdırılması zəruriyyəti formalaşıb. Xidmətin müddətindən asılı olaraq işaxtaran və xidmət almaq istəyən şəxslər üçün ərazi, peşəkarlıq səviyyəsi, qiymət, eləcə də digər səbəblər çətinlik formalaşdırırdı. Həmçinin işaxtaranla xidmət almaq istəyən şəxslərin bütün bunları elektron seçim etmək imkanları məhdud idi.
ED şirkətinin yaratmış olduğu əmək birjası mobil tətbiqi sifarişçilərin müraciətləri əsasında işsiz və işaxtaran şəxslərin birdəfəlik, qısamüddətli, mövsümi iş tapmalarını asanlaşdırır. Həmçinin mobil tətbiq işaxtaranın özünə ən yaxın ərazidə iş tapmasına, sifarişçinin isə qiymətləndirmələr sayəsində peşəkarlıq keyfiyyətinin uyğunluğunu yoxlayaraq xidmət almasına imkanlar yaradır. İş sifarişçisi xidmət almaq istədiyi şəxs haqqında mobil tətbiq vasitəsilə bütün rəsmi məlumatları ala bilir.
ED şirkətinin yaratdığı əmək birjası mobil tətbiqi işsiz və işaxtaran kimi rəsmi qeydiyyatda olan şəxslərin, eləcə də, xidmət sifarişçilərinin axtarışına bir sıra həllər gətirib.
